СЭТГЭЛ МИНЬ

Сэтгэл минь бурхан юм. Үргэлж би лам багшид мөргөдөг

Сэтгэл минь буг юм. Үргэлж би зүхүүлнэ

Сэтгэл минь эгээрэл юм. Үргэлж би шүтэн залбирна

Сэтгэл минь эндүүрэл юм.Үргэлж би зэмлүүлнэ.

Сэтгэл минь бүсгүй юм. Орчлонд би гоо сайхныг бэлэглэнэ

Сэтгэл минь дайсан юм. Өстөн минь өргөснөөс олон

Сэтгэл минь тэнгэр юм. Одоо ч би түүнийг ширтэн харсаар

Сэтгэл минь шунал юм. Одноос олон олз бодон хөрвөөнө.

Сэтгэл минь алт эрдэнэс юм. Хүмүүс намайг эрэн тэмүүлнэ

Сэтгэл минь өт хорхой юм. Хүмүүс намайг гишгичин өнгөрнө

Сэтгэл минь өршөөл юм. Хүмүүс надад өвдөг сөгднө

Сэтгэл минь сүнс сүлд юм. Хүмүүс намайг өргөмжлөн мөнхөлнөм.

Сэтгэл минь цэцэг юм. Үзэсгэлэнт бүсгүй намайг харан тайтгарна

Сэтгэл минь гэрэл гэгээ юм. Үдшийн сар надад атаархана

Сэтгэл минь гол мөрөн юм. Үерлэн шуугиж би газар дэлхийг ариусгана

Сэтгэл минь аялгуу дуу юм. Үймээнт хорвоо намайг чагнан уярна.

                                                                                                                    1999.03.14